你，想飛嗎？
你，想念天空嗎？
過左一個非常悠長嘅假期，公司大概已經遺忘左我，
為左刷一下存在感，終於打破連續四個月「零飛行時數」，終於有得返工
起飛嗰陣坐喺張凳望住一個人都冇嘅客艙，嗰下真係百感交集
💺
坐喺個位嗰幾分鐘，個腦就好似播帶咁諗返起以前嘅一切
某年某日，起飛嗰陣坐頭排個小朋友被薯片哽到要做急救
某年某日，坐我對面個客對住我噴射式咁嘔
某年某日，上機前知道好朋友離開左，坐喺呢張凳一路起飛一路喊
好懷念以前啲客一上黎問你拎六個枕頭四張氈
好懷念呀貴賓陳生死都唔肯收埋部電腦
好懷念呀吳小姐死都唔肯放好佢個名牌包包
好懷念有班大媽嘈到耳都聾
好懷念推開廁所門有個韓國阿豬媽冇著褲 (腿 張 開)
好懷念派餐冇哂雞飯比客屌到上天花板
的確係鬥智鬥力，不過亦係呢份工唔會悶嘅地方
仲有一班好好嘅同事，由未起飛玩到去外站，返到香港落機去飲茶，得閒再出黎玩
好掛住飛新加坡Turn做外賣仔，跑去買十一個班蘭蛋糕 加 七條卷蛋
飛西貢會一齊去拎豬扒飯外賣
去到外站成班人去超市買餸
仲有好朋友 M小姐嘅愛心韓國炒粉絲
當一切都變得陌生，當一切都再唔係理所當然，
然後呢？ 然後還有然後嗎？
咁多位同事，
今次呢次 Turbulence 真係好嚴重，
希望大家都可以捱得過黎緊嗰一關。
「祝 你 亂 流 下 平 安」
Search